Причини зошто треба да штедиш



Денес кога е толку лесно да земеш кредит, зошто би сакал да заштедиш некој денар? Овој начин на размислување има смисла за премногу луѓе во денешно време. Во продолжение се осумте причини зошто треба да штедиш:

1. За да станеш финансиски независен

Не постои мерило за тоа колку треба да поседуваш за да бидеш богат - тоа е различно за секого. Како и да е, поимот "да се биде богат" за најголем дел од луѓето значи да се биде финансиски независен односно да имаш слобода да правиш избор во твојот живот. Тоа подразбира да бидеш во можност да одиш на одмор кога ќе посакаш, да ја напуштиш тековната работа доколку не ти се допаѓа, да започнеш сопствен бизнис, да им помогнеш на членовите од семејството или да се пензионираш кога што сакаш наместо да работиш затоа што си едноставно зависен од платата. Да бидеш финансиски независен не е исто што и да бидеш богат, но самото тоа што не зависиш од плата придонесува да се чувствуваш богато.

2. Штеди по 50% на намирниците што ги купуваш

Доколку вообичаено купуваш со кредитна картичка а притоа не ги исплаќаш долговите во целост секој месец, плаќаш во најмала рака 50% повеќе за се што ќе купиш. Ако се потпираш на кредитните картички за да си дозволиш одреден животен стил, прекини ја таа скапа навика со тоа што ќе започниш да купуваш на попуст. Луѓето што штедат, купуваат поголема залиха од намирниците кои се на попуст (намирници кои не се расипливи). Докажано е дека луѓето што го прават ова заштедуваат до 24% од вкупниот буџет за намирници.

3. За да купиш стан

Банката нема да ти даде кредит за да си купиш стан доколку немаш пари за учество. Мора да имаш заштеда за учество или пак тие пари да ги добиеш како поклон - а не како заем. Учеството треба да биде најмалку 5% од куповната цена на станот, потоа банката донесува одлука за одобрување на кредитот (останатите 95%). Постојат и дополнителни трошоци како што се даноци кои мора да се подмират кога купуваш стан, па поради тоа ќе ти бидат потребни дополнителни 5%. Штедењето е тоа што ќе ти отвори врати за да си купиш дом.

4. За да купиш автомобил

Кога сакаш или ти е потребно да купиш нов автомобил мора да имаш готовина за да ти одобрат автомобилски кредит со поволна каматна стапка. Може да позајмиш пари и од твојата кредитна картичка, но тогаш каматната стапка ќе ти биде многу поголема па затоа размисли добро дали сакаш да си создаваш главоболки. Најдобрата работа што може да ја направиш е да заштедиш средства со таа намена а потоа да одлучиш која опција е најдобра за тебе. Можеби ќе одлучиш да купиш половен автомобил наместо нов.

5. За да ги подмириш долговите

Доколку сакаш да излезеш од долгови, мора да заштедиш некој денар. Како и да е, кредитните картички постојано ќе ти бидат во минус доколку ги користиш за секоја "вонредна ситуација". Дури и да си извонреден планер, статистиката покажува дека кај секој втор се јавува најмалку по еден неочекуван трошок секоја година. Пред да започнеш да навлегуваш во минус на твојата кредитна картичка, треба да издвојуваш секој месец одреден износ во твојот резервен фонд кој ќе биде наменет за подмирување на неочекуваните трошоци. Водењето на резервен фонд ќе ти помогне да забележиш доколку трошењето излезе "надвор од контрола".

6. За годишни трошоци

Доколку сакаш да имаш добар и релативно мирен финансиски живот, треба да имаш заштеда за подмирување на годишните издатоци. Тоа вклучува пари за подароци, одмори, трошоци околу одржување на автомобилот, поправки во домот, плаќање на даноци и сл. Можеби ви изгледа примамливо да подигнете кредит за да го подмирите минусот од кредитната картичка, но опасно е бесконечното задолжување со кредити без да ги отплаќате навреме. Најдобар начин да ги изменаџираш овие трошоци е да штедиш конкретно за нив со време. Тоа не само што ќе ти помогне да заштедиш пари, ќе ти донесе и мир.

7. За непредвидени трошоци

Што ќе направиш ако на твојот автомобил му е потребна поголема поправка? Што ако ти излезат дополнителни давачки околу домот? Не можеш постојано да се потпираш на банката и да се надеваш дека ќе ти одобри кредити за сите овие работи. Многу е подобро да бидеш подготвен на најлошото сценарио и да имаш одредена заштеда.

8. За подобар живот

Луѓето што не ја планираат својата иднина се чини дека навлегуваат од една криза во друга. Има вистина во тоа дека среќата доаѓа од твојата способност за организација. Да се биде организиран само по себе нема да те направи среќен, но секако дека ќе ти помогне. Има многу нешта што не може да се контролираат, но затоа одвојувањето на пари за "црни денови" е всушност добра организација и превземање контрола врз вашата иднина и финансиската состојба. Нема што да изгубиш доколку штедиш - само можеш да си обезбедиш посреќна иднина.

Склучете го својот програмиран план уште денес! 

Штедењето треба да го прифатите како редовна обврска - како сметка што треба да се плати прва во месецот . Преку програмираниот план редовно вложувате средства во избраниот фонд и на тој начин постепено ја создавате и оплодувате својата заштеда. 

Превземено: КД Фондови

Што да направите доколку банкоматот ви ја “проголта“ картичката?

Дали ви се случило банкоматот да ви ја “проголта“ картичката и во истиот момент да не знаете што да направите, а парите ви се повеќе од потребни? Или можеби сте ваделе пари од банкомат, парите ви се симнати од сметката, а банкоматот не ви ги исфрлил?


Што треба да направите доколку се најдете во ваква ситуација, одговор побаравме во ПроКредит банка.

Во првиот случај, најчестата причина поради која банкоматот може да ја задржи картичката е доколку се внесе погрешен пин три пати по ред.
“Доколку картичката е заглавена на банкомат, клиентите треба да се јават во Контакт центарот на Банкатаи да го пријават случајот или да известат во најблиската експозитура. Потоа банката, по барање на клиентот ја повлекува картичката и ја доставува во експозитурата која му е најблизу на клиентот за подигнување. Клиентите треба да достават документ за лична идентификација за да може да ја подигнат картичката“, објаснуваат од ПроКредит банка.

Доколку картичката е заглавена на банкомат на друга банка, како што посочуваат од ПроКредит, клиентот треба да ја посети таа банка со лична карта или пасош во најскоро време. Во меѓувреме, клиентот може да ја блокира својата картичка со повик во Контакт центарот доколку е потребно и доколку сака дополнително да се заштити, независно од работното време на експозитурите.

“Доколку картичката е заглавена на банкомат во странство, за истото важат правилата на таа земја и таа банка. Во тој случај, најдобро е картичката да се блокира преку повик во Контакт центарот, а клиентот по враќањето да аплицира за нова картичка. ПроКредит банка ја нуди можноста за враќање на картичка од банкомат на ПроКредит на сопственикот на картичката, во текот на истиот ден“, наведуваат од Банката.

Во вториот слушај, од ПроКредит советуваат клиентот најпрво да провери дали парите се повлечени од неговата сметка. Тоа може да се направи со проверка на состојбата на сметката на банкоматот, во експозитура, преку Контакт центарот на банката или со преглед на изоводот од системот за електронско банкарство.

“Доколку парите се повлечени, а не се исплатени клиентот треба да се обрати во било која филијала на Банката. Според резултатот од испитување на случајот, парите ќе бидат вратени на неговата сметка. Доколку ова се случи во странство, наједноставна проверка за состојбата на сметка е преку системот за електронско банкарство или директно со повик во Контакт центарот. Враќањето на средствата зависи од интерната процедура на странската банка на чиј банкомат не се случила предвидената исплата на средства“, потенцираат од ПроКредит.

Инвестирање: Познавај се себеси

Секој потенцијален вложувач би можел многу да научи од познатата максима, испишана на Храмот на богот Аполон во Делфи: “Познавај се себеси”. Во контекст на инвестирањето, мудрите зборови на пророкот нагласуваат дека успехот во оваа работа зависи од нашето лично уверување дека избраната стратегија на вложување ни се вклопува во карактерните особености.
 
Иако се чини дека сите инвеститори имаат иста цел – да направат пари, секој од нив има свои различни потреби. Следствено на тоа, специфични инвестициски алатки и методи се соодветни за конкретен тип на вложувачи.  И покрај тоа што постојат многу фактори кои одредуваат каков начин на вложување да се одбере, ние би се задржале на две категории кои ги сметаме за клучни: Инвестициските цели и Карактерните црти.

Инвестициски цели

Општо земено, постојат неколку фактори кои вложувачите треба да ги земат предвид, пред да одлучат каде да ги пласираат своите пари. Сигурноста на влогот, тековните примања и очекуваниот принос, се фактори коишто треба да влијаат врз одлуката како и каде да се вложува, а тие од своја страна се предодредени од возраста на поединецот, животна фаза во која тој/таа се наоѓа, работната позиција,  како и индивидуалните  околности.

На пример, 75 годишна вдовица која ја користи својата пензиска заштеда за подмирување на животнити потреби, би била далеку позаинтересирана за задржување на вредноста на главницата од еден млад 30 годишен менаџер. Бидејќи таа преживува од каматата која ја добива за својот влог, не може да си дозволи да ризикува со загуба на дел од него. Спротивно на неа, младиот менаџер го има времето за свој сојузник. Тој може да одбере поагресивна вложувачка стратегија со потенцијал за поголема заработка, затоа што останатите приходи кои ги остварува му ги „плаќаат сметките“.

Тековната финансиска состојба, исто така има големо влијание врз поставените цели. Целите на еден богат бизнисмен во никој случај не можат да бидат еднакви со целите на млад брачен пар, кој тукушто го започнува заедничкиот живот. Бизнисменот можеби без проблем би вложил 100.000 евра во акции на берза, во обид да го зголеми својот профит за таа година. За него, „стотчето“ најверојатно е само мал дел од вкупното богатство кое го поседува. Истовремено, младиот брачен пар, кој секој месец се бори со отплата на ратата за новиот стан, не може да си игра со своите заштеди. Без оглед на потенцијалот за добивка од поризичното вложување, тоа едноставно не е соодветно за нив.

Во правилата на игра со парите, постои едно општоприфатено правило кое вели дека колку е пократко времето што го имате на располагање, толку поконзервативни треба да бидете при вложувањето.  За илустрација, ако вложувате за повисока пензија и се наоѓате во Вашите „доцни дваесетти“ години, имате повеќе од доволно време да ја надополните секоја потенцијална загуба. Дополнително, доколку сте започнале да вложувате додека сеуште сте млади, нема потреба да тргате настрана голем дел од Вашата плата, затоа што моќта на каматно-каматниот ефект работи за Вас низ времето.

Oд друга страна, доколку Ви се наближуваат пензионерските денови, многу е важно да ја задржите вредноста на заштедата што сте ја акумулирале низ годините, односно да ја зголемувате по малку, но сигурно. Бидејќи наскоро ќе почнете да ги повлекувате тие средства, сигурно не би сакале да ризикувате загуба на дел од заштедата поради крах на берзите токму во моментот кога парите Ви се најпотребни.

Карактерни црти

Каков е твојот животен стил? Љубител ли си на брзи автомобили и екстремни спортови? Те возбудува ли ризикот  или пак преферираш да си читаш некоја добра книга, уживајќи во спокојството и безбедноста кои ги нуди твојот топол дом?

Питер Линч, еден од најголемите инвеститори на сите времиња, има кажано дека “клучен орган при вложувањето е стомакот, а не мозокот”. Со други зборови, треба да сте свесни колкаво намалување во вредноста на вложените средства сте подготвени да прифатите. Утврдувањето на личниот степен на толеранција кон ризикот е тешко да се постигне прку некој научен метод. Затоа, попрактично би било одговорот да го побарате во старата ивестициска пословица, која вели: “Ќе сфатиш дека си презел преголем ризик, доколку ноќе немирно спиеш, поради грижата за вредноста на вложените пари”.

Друга карактерна особина, која влијае врз изборот на Вашиот стил на вложување е интересот за анализа на потенцијалните инвестиции. За некои луѓе „копањето по финансиски извештаи“ и играта со бројките претставуваат вистинска возбуда. За други пак, читањето на биланси на успех, биланси на состојба и анализи за вреднувањата на поединечните акции е забавно колку и требењето на зрна ориз. Најголемиот дел од луѓето воопшто и немаат време навлезат подлабоко во суштината на објавените проспекти и финансиските извештаи.

Резиме: Толеранција кон ризикот

Од досега кажаното, веројатно Ви е веќе јасно дека главниот елемент кој одредува што најдобро за еден инвеститор е неговиот капацитет за преземање на ризик.
Веќе споменавме неколку клучни фактори кои ја одредуваат толеранцијата кон ризикот, но важно е да се запомни дека секој поединец си има своја специфична ситуација, па поради тоа наведеното дотука не претставува сеопфатна листа на карактеристики по кои инвеститорите се разликуваат еден од друг. Она што е битно да се запомни од овој дел е дека за различни луѓе постои различна понуда на вложувачки производи. Имајте го тоа наум при читањето на следните поглавја од оваа наша  рубрика.


Превземено: КД Фондови

Што е тоа вложување?


 
Вложување; Англиски: Investing - Чинот на пласирање на капиталот во некој бизнис, со очекување да се постигне дополнителна заработка или профит.
 
Ова всушност е прилично едноставен концепт: Вложувањето означува ангажирање на Вашите пари на начин кој ќе овозможи тие да работат за Вас. Во основа, тоа е еден поинаков начин на размислување како да се заработат пари. Додека растевме, мнозинството од нас бевме воспитувани дека единствен начин за заработка на пари е вработувањето и добивањето на плата за извршената работа. За волја на вистината, речиси сите го следиме овој пример. Но, тука постои еден голем проблем: доколку сакаме да заработиме повеќе пари, треба да работиме повеќе часови. Покрај тоа, лимитирани сме во однос на бројот на часови кои можеме да ги изработиме во текот на еден работен ден, а да не споменуваме дека и поседувањето на купишта пари не би било многу забавно, доколку немаме слободно време за да уживаме во нив.

Да се клонираме самите себе, со цел да изработиме повеќе работни часови е сеуште невозможно, па оттаму, попаметно би било да ги пуштиме парите да поработат малку наместо да спијат во паричникот или на банкарската сметка. И така, додека си ги изработувате задолжителните работни часови, спиете, си читате вести или пак се дружите со пријателите, можете да си заработувате пари и од друго место. Многу е просто - доколку ги натерате парите да поработат за Вас, ќе си ги зголемите шансите за дополнителна заработка, без разлика дали во меѓувреме ќе добиете покачување на платата, ќе работите прекувремено или ќе си барате нова, подобро платена работа.

Постојат повеќе различни начини да се направи вложување. Тука, од многуте опции, како најдостапни би можеле да ги издвоиме купувањето на акции, обврзници или удели од инвестициски фонд, стекнувањето на недвижен имот, или пак, започнувањето на сопствен бизнис. Понекогаш, овие постоечки можности помеѓу стручната фела се нарекуваат “инвестициски алатки”, што е само уште еден поинаков израз за “начини на вложување”. Секоја од понудените алатки си има свои позитивни и негативни страни, за коишто ќе дискутираме подоцна во оваа рубрика. Најбитно од сѐ е да запомниме дека без разлика на избраниот начин на вложување, поентата е парите да се стават во функција на заработка на дополнителни пари. Иако се чини едноставно на прв поглед, сепак тоа е најважниот концепт кој треба да се разбере.

Што не е вложувањето?

Вложувањето не е обложување. Обложувањето претставува ризикување на одредена сума пари, со надеж да се заработи поголема. Ризикот е да се загуби целата сума, доколку не се исполнат условите за добивка. Ваквиот ризик не е карактеристичен за осмисленото вложување.

Прав инвеститор никогаш не би ги расфрлал своите пари. Тој носи одлука за вложување на основа на темелни анализи и консултации и со разумни очекувања во однос на потенцијалната заработка. Да, точно е дека гаранција нема за ништо и ризикот секогаш постои, но вложувањето е многу повеќе од просто надевање дека среќата овој пат нема да ни го сврти грбот.

Зошто би се заморувале со вложување воопшто?

Неспорен факт е дека сите сакаме повеќе пари. Прилично е лесно да се разбере доколку луѓето би вложувале за да креираат заштеда со која би си ги дозволиле нештата кои ги посакуваат или за да се чувствуваат посигурни во однос на иднината.

Меѓутоа, вложувањето сѐ повеќе станува потреба, а не личен избор. Времињата кога вработените го минуваа целиот работен век во една фирма или институција, а потоа примаа пензија која им овозможуваше достоинствен живот, одамна си заминаа. За сите кои денес работиме и ги заработуваме приходите на месечно ниво, постепеното и редовно вложување е можеби единствениот начин да го задржиме нивото на животниот стандард и по пензионирањето.

Без разлика дали живеете во САД, Германија или Македонија, кога е во прашање планирањето на пензијата, топката се префрла од државата кон поединецот. Актуелни се бројни дебати околу тоа дали постоечкиот пензиски систем е одржлив и ќе може да исплаќа пензии после 20, 30 или 50 години. Кога веќе упатените во проблематиката отворено предупредуваат, зошто ние да седиме со скрстени раце и да чекаме што ќе ни се случи? Со добра подготовка и навремено планирање, благосостојбата во пензионерските денови е реално достижна.

Сега, кога добивте генерална претстава за тоа што претставува вложувањето и зошто треба да го практикувате, време е да научите како истото ќе Ви помогне како да извлечете корист од едно од чудата на математиката – Каматно-каматниот ефект.

Превземено: КД Фондови

Кои се причините поради кои треба да ја смените банката?

Постојат работи кои можеме и работи кои не можаме да ги толерираме. Некои од нив говорат дека можеби дошло време да се смени банката Ова се неколку причини за да го направите тоа.

1. Надокнади, такси

Банките им наплатуваат на клиентите надокнади за одредени производи и услуги кои ги користат и не ги користат. Некои можеби и не сте ги забележале. Ако имате високи или неочекувани трошоци, на пример, на сметките за одржување, високи трансакциски провизии, високи камати, можеби е време да размислите за промена. Овие трошоци можат бргу да се соберат и да се прикажат на вашата сметка. Можеби ќе можете да ги елиминирате ако разговарате со својот банкарски службеник, но одете вооружени со знаење каде можете да добиете подобра понуда.

2. Достапност

Банкарските услуги треба да бидат според вашите потреби. Всушност, тоа се ваши пари, така што би требало да можете да ги користите кога и како што сакате. Во секој момент треба да имате пристап до своите пари. Тоа е една од најважмните работи при изборот на банка. .

Ако сакате готовина за вас е важно да бидете сигурни дека можете да ги подигнете своите пари во секој момент. Распоредот на банкомати и на експозитури на банките е од пресудно значење при нејзиниот избор.

Ако сакате да го следите секој свој налог каде и да сте, за тоа ви е потребна функција како мобилно банкарство и онлајн трансакции. Банката која ја бирате мора да ги има тие можности, а притоа да не ги наплатува дополнително.

3. Кориснички сервис

Некои банки изгледа не го ставаат на прво место односот со клиентите. Ако се чувствувате невидливо на шалтерите, референтите за кредити или претставниците на корисничкиот сервис не го сослушале адекватно вашиот проблем, можеби е време да се разгледува промена на банката и барање на онаа која ќе ви понуди попријатно банкарско искуство. Исто така, проверете дали СОС линијата или онлајн сервисот ви се на располагање 24/7.

4. Не го следи движењето на каматите

Сакате можност да заработите фер каматна стапка на своите штедни сметки. Немојте да ја пропуштите приликата парите кои веќе ги имате за вас да заработат дополнителни пари. Ако вашата банка не дава пристојни камати на заштедите, тоа е можеби уште една причина да размислите за промена. .

5. Сигурност

Ако Агенцијата за осигурување на депозитите не ја осигурува вашата банка, сметајте го тоа за црвено светло. Оваа организација е одговорна за осигурување на парите кои се во банките, вклучувајќи ги и заштедите. Важно е да се уверите дека вашите пари се на сигурно.

6. Промени во начинот на живот

Ако неодамна сте имале промена на вашата одговорност на работа, на работното место, на брачната состојба или финасиската, на здравјето, можеби ќе морате да разгледате нови банкарски можности. Кога вашите банкарски потреби се менуваат, тоа е добро време повторно да процените дали вашата банка и понатаму ги задоцволува тие потреби. .

На пример, ако вашата банка нема најдобри каматни стапки на хипотекарните кредити, а вие оваа година планирате да купите стан, можеби ќе сакате да ја разгледате можноста за преминување во банка која дава подобра понуда.

Ако се одлучите да направите промена, важно е да споредите повеќе банки и да ја пронајдете најдобрата понуда која не подразбира високи трошоци и ги има на располагање опциите кои вам во моментот ви се потребни.

При преминувањето во друга банка задолжително затворете ги сите сметки и намирете ги сите обврски кон претходната банка.

Животно осигурување плус инвестирање на светските берзи

 

Нов производ на македонскиот пазар: Винер лајф и ВФП Фонд менаџмент нудат за корисникот на оваа полиса да биде животно осигурен, а истовремено да стане и инвеститор во акции на најголемите светски компании.

Осигурителната куќа Винер лајф во партнерство со инвестицискиот фонд ВФП Фонд менаџмент лансираа нов производ, Лајф инвест, кој што претставува спојување на животното осигурување и вложување во инвестициски фонд. Тоа значи дека парите што имателите на овој тип полиса за животно осигурување ќе ги уплаќаат во Винер лајф, фондот ВФП ќе ги инвестира во акции на компании што котираат на берзите во САД, Германија, Швајцарија и останатите развиени пазари.

“Овој е еден од поатрактивните осигурителни производи што на странските пазари веќе подолго време е присутен, а предноста за физичките лица е што на овој начин може да вложат во акциите на најголемите светски компании и на тој начин да бидат во добивка што може да е значајно поголема од онаа остварена од штедење во банка, на пример“, изјави Дарко Дедиќ, претседател на УО на Винер Лајф.

Дирекорот на ВФП Фонд менаџмент, Петар Андреевски, истакна дека овој производ по својата софистицираност е еднаков на финансиските продукти што им се нудат на најбогатите луѓе во западните земји, со тоа што во Македонија може да станете инвеститор во светските компании, само со животна полиса од неколку стотини евра.

 

Pratete ne na Facebook!